വേളം: (kuttiadi.truevisionnews.com) ആഡംബര ആഘോഷങ്ങൾ ഒഴിവാക്കി സഹജീവികളെ സഹായിക്കുന്ന വേറിട്ട മാതൃകയുമായി വേളം ഹൈസ്കൂളിലെ 1996 എസ്.എസ്.എൽ.സി ബാച്ച് പൂർവ്വ വിദ്യാർത്ഥിക്കൂട്ടായ്മ.
കൂട്ടായ്മയുടെ പത്താം വാർഷികത്തോടനുബന്ധിച്ച് നിശ്ചയിച്ചിരുന്ന ആഘോഷ പരിപാടികളുടെ ചെലവ് ചുരുക്കി, ആ തുക എടച്ചേരി തണൽ റിഹാബിലിറ്റേഷൻ സെന്ററിലെ അന്തേവാസികളുടെ ഒരു ദിവസത്തെ ഭക്ഷണത്തിനായി കൈമാറി.
2017 മുതൽ സജീവമായ ഈ കൂട്ടായ്മ കഴിഞ്ഞ ഒൻപത് വർഷത്തിനിടയിൽ 15 ലക്ഷം രൂപയുടെ ജീവകാരുണ്യ പ്രവർത്തനങ്ങളാണ് നടത്തിയത്. നിർധനനായ ഒരു സഹപാഠിക്ക് വീട് നിർമ്മിച്ചു നൽകിയതുൾപ്പെടെയുള്ള മാതൃകാപരമായ ഒട്ടേറെ ഇടപെടലുകൾ ഇതിനോടകം ഈ ബാച്ച് നടത്തിയിട്ടുണ്ട്.
തണലിൽ നടന്ന ഭക്ഷണ തുക കൈമാറ്റ ചടങ്ങിൽ സതീശൻ തായനപ്പാറ, അൻവർ, രജീഷ് അരൂർ, രാജേഷ്, ജീന കെ.സി., ശാലിനി, രാജേഷ് കെ.കെ. തുടങ്ങിയവർ പങ്കെടുത്തു. സഹപാഠികളെ സഹായിക്കുന്നതിനൊപ്പം സമൂഹത്തിലെ പാർശ്വവൽക്കരിക്കപ്പെട്ടവർക്കും തണലാകുക എന്ന ലക്ഷ്യത്തോടെയാണ് ഈ കൂട്ടായ്മ മുന്നോട്ട് പോകുന്നത്.
Content Highlight: Velam alumni donate food expenses to Edacherry Thanal
