'ശോഭീന്ദ്രം' മഴയാത്ര ശനിയാഴ്ച കുറ്റ്യാടി ചുരത്തിൽ നടക്കും

കുറ്റ്യാടി:(kuttiadi.truevisionnews.com)കുറ്റ്യാടിയിൽ പരിസ്ഥിതി വിദ്യാഭ്യാസ പദ്ധതിയായ 'സേവിൻ്റെ' പതിമൂന്നാമത് മഴയാത്ര നാളെ കുറ്റ്യാടി ചുരത്തിൽ വെച്ച് നടക്കും. പരിസ്ഥിതി പ്രവർത്തകനും അധ്യാപകനുമായിരുന്ന പ്രൊഫ. ശോഭീന്ദ്രന്റെ സ്മരണാർത്ഥം 'ശോഭീന്ദ്രം' എന്നാണ് ഈ വർഷത്തെ മഴയാത്രയ്ക്ക് പേരിട്ടിരിക്കുന്നത്. 'മഴയും ജീവനും' എന്നതാണ് യാത്രയുടെ പ്രധാന പ്രമേയം. നാളെ രാവിലെ 9 മണിക്ക് വാളാന്തോട് വെച്ച് കൃഷിവകുപ്പ് മന്ത്രി ടി. സിദ്ധീഖ് പരിപാടി ഉദ്ഘാടനം ചെയ്യും.

വാളാന്തോട് നിന്നും ആരംഭിച്ച് കുറ്റ്യാടി ചുരത്തിലൂടെയും കാനന പാതയിലൂടെയും സഞ്ചരിച്ച്, കാട്ടിനുള്ളിലെ വെള്ളച്ചാട്ടത്തിന്റെ ഭംഗി ആസ്വദിച്ച് ഹിൽ ബറക്കിന് സമീപം യാത്ര സമാപിക്കും. കോഴിക്കോട് ജില്ലയിലെ വിവിധ വിദ്യാലയങ്ങളിൽ നിന്നുള്ള ആയിരത്തോളം സ്കൂൾ വിദ്യാർത്ഥികൾക്കാണ് ഇതിൽ പങ്കെടുക്കാൻ അവസരം ലഭിക്കുക. പങ്കെടുക്കാൻ ആഗ്രഹിക്കുന്ന വിദ്യാഭ്യാസ സ്ഥാപനങ്ങൾ 9495400909 എന്ന നമ്പറിൽ വിളിച്ച് പേര് രജിസ്റ്റർ ചെയ്യേണ്ടതാണ്.

മഴയാത്രയോടനുബന്ധിച്ച് മഴ വര, മഴപ്പാട്ട്, മഴ ചിത്രപ്രദർശനം, മഴ ക്യാമ്പ് എന്നിവയും സംഘടിപ്പിച്ചിട്ടുണ്ട്. പവിത്രൻ കുറ്റ്യാടിയുടെ നേതൃത്വത്തിലുള്ള നാടൻപാട്ട് സംഘം മഴപ്പാട്ടുകൾ അവതരിപ്പിക്കും. യാത്രയിൽ പങ്കെടുക്കുന്ന വിദ്യാർത്ഥികളുടെ പ്രകടനം, വേഷം, അച്ചടക്കം, പരിസ്ഥിതി സൗഹൃദ ഇടപെടലുകൾ എന്നിവ മുൻനിർത്തി മികച്ച വിദ്യാലയങ്ങൾക്ക് ട്രോഫികൾ നൽകും. ഒന്നാം സ്ഥാനം നേടുന്ന സ്കൂളിന് പ്രൊഫ. ശോഭീന്ദ്രൻ സ്മാരക ട്രോഫിയും, രണ്ടാം സ്ഥാനത്തിന് സുഗതകുമാരിയുടെ പേരിലുള്ള ട്രോഫിയുമാണ് സമ്മാനിക്കുക.

പങ്കെടുക്കുന്ന എല്ലാ കുട്ടികൾക്കും സർട്ടിഫിക്കറ്റുകൾ വിതരണം ചെയ്യും. കൂടാതെ, ഇതിന്റെ ഭാഗമായുള്ള മഴ ക്യാമ്പ് ഇന്ന് വാളാന്തോട് ഹിൽവ്യൂ റിസോർട്ടിൽ വെച്ച് നടക്കും. 50 പേർക്ക് മാത്രമായി പരിമിതപ്പെടുത്തിയിരിക്കുന്ന ക്യാമ്പിൽ പങ്കെടുക്കാൻ താല്പര്യമുള്ളവർ 7025877300 എന്ന നമ്പറിൽ ബന്ധപ്പെടേണ്ടതാണ്.

Content Highlight: Kuttiyadi, 'Shobheendram' Rain Journey, memory of Prof. Shobheendran, Kuttiyadi Ghat Road Rain Journey

#Latest News #kuttiyadi #Kuttiady Churam #Shobhindram Mazhayathra