കാവിലുംപാറ: (kuttiadi.truevisionnews.com) പരിസ്ഥിതി സൗഹൃദ മാതൃകകൾ ഉയർത്തിപ്പിടിച്ച് കാവിലുംപാറ ഗ്രാമപഞ്ചായത്തിലെ കൂടലിൽ ഗവൺമെന്റ് എൽ.പി സ്കൂൾ ജില്ലയിലെ ആദ്യ 'നെറ്റ് സീറോ കാർബൺ' പദവി കൈവരിച്ചു. തിരുവനന്തപുരം ഉദയ പാലസിൽ നടന്ന നവകേരള മിഷൻ ദേശീയ പരിസ്ഥിതി സമ്മേളനത്തിൽ വെച്ച് വിദ്യാലയത്തിനുള്ള ഔദ്യോഗിക പുരസ്കാരവും സർട്ടിഫിക്കറ്റും എ.എ. റഹിം എം.പിയിൽ നിന്ന് കാവിലുംപാറ ഗ്രാമപഞ്ചായത്ത് പ്രസിഡന്റ് മേഘ പൊയിലുപറമ്പത്ത് ഏറ്റുവാങ്ങി.
ഹരിതകേരള മിഷന്റെ ആഭിമുഖ്യത്തിൽ നടപ്പിലാക്കുന്ന 'നെറ്റ് സീറോ കാർബൺ കേരളം ജനങ്ങളിലൂടെ' എന്ന ക്യാമ്പയിന്റെ ഭാഗമായാണ് ഈ നേട്ടം. ഐ.പി.സി.സി (IPCC) മാർഗ്ഗനിർദ്ദേശങ്ങൾ പ്രകാരം, വിദ്യാലയത്തിലെ നേരിട്ടുള്ള കാർബൺ പുറന്തള്ളൽ , പരോക്ഷമായ കാർബൺ പുറന്തള്ളൽ എന്നിവ കണക്കാക്കി നടത്തിയ ശാസ്ത്രീയ പഠനത്തിന്റെ അടിസ്ഥാനത്തിലാണ് കൂടൽ സ്കൂൾ ഈ അഭിമാനകരമായ നേട്ടത്തിന് അർഹമായത്.
പ്രൗഢഗംഭീരമായ ചടങ്ങിൽ നവകേരള കർമ്മപദ്ധതി സംസ്ഥാന കോഡിനേറ്റർ ഡോ. ടി.എൻ. സീമ, അസിസ്റ്റന്റ് കോഡിനേറ്റർ ടി.പി. സുധാകരൻ, കാവിലുംപാറ ഗ്രാമപഞ്ചായത്ത് വൈസ് പ്രസിഡന്റ് രമേശൻ മണലിൽ, ഹരിതകേരളം ബ്ലോക്ക് കോഡിനേറ്റർ സി.പി. ശശീന്ദ്രൻ എന്നിവർ പങ്കെടുത്തു. കാർബൺ പാദമുദ്രകൾ കുറയ്ക്കുന്നതിനായി വിദ്യാലയം നടപ്പിലാക്കിയ മാതൃകാപരമായ പ്രവർത്തനങ്ങൾക്കുള്ള അംഗീകാരമാണിത്.
GLP School in Koodail gets first 'Net Zero Carbon' status in the district
